Radikulit - onurğa beyni kötüklərinin zədələnməsidir. Əmələ gəlməsinin əsas səbəbi onurğanın osteoxondrozudur. Bununla belə, infeksiyanın, soyuqlamanın, intoksikasiyanın (zəhərlənmənin), damar pozğunluqlarının, travmanın da rolu istisna edilmir. Radikulit periferik sinir sistemi xəstəliklərinin ən çox təsadüf edən (90%-ədək) klinik formasıdır. Daha çox bel-oma lokalizasiyalı (yerləşdiyi yer, nahiyə) radikulitlər müşahidə edilir. Onurğanın bel-oma şöbəsi daha çox fiziki gərginliyə məruz qalır və müvafiq olaraq, fəqərəarası qığırdaq diski bu səviyyədə daha qabarıq dəyişikliklərə uğramış olur. Nadir hallarda boyun, döş radikulitləri də müşahidə edilir. Radikulitə, yerləşdiyi yerdən asılı olmayaraq, zədələnmiş kötüklərin innervasiya (sinirlənmə) zonalarında ağrı, bu ağrının hərəkət zamanı, öskürdükdə, asqırdıqda, güc verdikdə artması, onurğanın hərəkiliyinin məhdudlaşması, xəstənin qoruyucu poza (ağrıya qarşı məcburi vəziyyət) alması, onurğanın sümük çıxıntılarına, onurğa kənarı nöqtələrə təzyiq etdikdə ağrının olması xasdır. Bel-oma radikulitinin gedişində əsas 2 stadiya ayırd edilir. İlkin stadiya lümbalgiya stadiyası (bax: lümbaqo) adlanır, və bu zaman bel nahiyəsində küt, sızıltılı, çox vaxt isə kəskin ağrılar əmələ gəlir. Ağrı fiziki gərginlikdən, soyuqlamadan sonra əzələlərdə əmələ gəlir və tədricən artaraq öskürək və asqıraq zamanı güclənir. İkinci - kötük stadiyasında ağrı güclənir, xarakterini dəyişir, sağrı nahiyəsinə, bud və baldıra verir. Bəzi hallarda patoloji proses onurğa kötüklərindən oturaq sinirə də yayılır. Oturaq sinirin zədələnməsi - işias - beldə və oturaq siniri boyu ağrı ilə, baldırın ön qrup əzələlərinin atrofiyası (inkişafdan qalması, zəifləməsi) və ayaq pəncənsinin sallanması ilə müşayiət olunur.